murr_murr_murr

За 99,9%!

Thu, 24 Dec 2009 18:57:51 GMT

Дзеючыя асобы:

ІП №1
ІП №2
Радыё
Міністр эканомікі

Дзея першая, яна ж і апошняя

Рынак. Зіма. Мароз -20. Два ІП як пігнвіны стаяць і тупаюць з нагі на нагу. Гучна іграе радыё.

ІП №1: Холадна, аднак.

ІП №2: Ну, блін, не май месяц!

Радыё: Як заявіў сёння міністр эканомікі, лібералізацыя ідзе поўным ходам і хутка айчынны бізнэс дасягне 30% ва ўнутраным валавым прадукце краіны… мы амаль поўнасцю перайшлі на беларускія тавары – імпартазамяшчэнне дасягнула 99,9%...

ІП №1: Ахрэнець! Дзе тая лібералізацыя? Нехта не бачу яе!

ІП №2: Ну блін, якія 30% - тут хаця б аднаго пакупніка сустрэць!

На гарызонце з’яўляецца фігура пакупніка.

ІП №1: О! Глядзі, нехта да нас ідзе!

ІП №2: Няўжо ж! Мо што і купіць шчэ?

ІП №1: Халера яго ведае, зараз пабачым…

Пакупнік набліжаецца і ўжо можна разгледзець рысы твару.

ІП №2: Халера ясная – гэта ж міністр эканомікі!

ІП №1: Во блін, мо ён нам лібералізацыю прынёс?

ІП №2: Зараз паглядзем…

Міністр эканомікі: Здрасьце дзядзькі, тэлевізар хачу добры
набыць…

ІП №1: О, канечне, выбірайце: вось “Гарызонты”…

Міністр эканомікі: Не-не-не, дзякуй, я хачу менавіта ДОБРЫ тэлевізар, а не “Гарызонт”..

ІП №2: О, тады, калі ласка, да мяне – вось “Віцязі” стаяць тут і
15 дзюймаў, і 17…

Міністр эканомікі: Хлопцы, ды вы што! Я ж кажу – ДОБРЫ
тэлевізар! Ёсць “Філіпсы” ці “Самсунгі”…

Радыё: Як паведаміў сёння міністр эканомікі, лібералізацыя ідзе поўным ходам і хутка айчынны бізнэс дасягне 30% ва ўнутраным валавым прадукце краіны… мы амаль поўнасцю перайшлі на беларускія тавары – імпартазамяшчэнне дасягнула 99,9%...

Канец :)

З.Ы. Супадзенні з рэчаіснасцю цалкам выпадковыя

За прапаганду!

Sun, 26 Jul 2009 23:37:20 GMT

Беларускія вытворцы дастаткова аператыўна адрэагавалі на "малочную вайну" з Расіяй. Прынамсі, Добрушскі фарфоравы завод вырашыў падтрымаць малочныя прадпрыемствы прапагандысцкімі метадамі - у продаж паступілі адмысловыя кубкі з надпісам "І love milk" і выявамі хітрых дзяўчынкі ды хлопчыка.

Дарэчы, той жа Добрушскі фарфоравы завод прапануе так званыя "наборы для малака", відаць, з тымі ж прапагандысцкімі мэтамі.
Кошт кубка "I love milk" складае трохі болей за Br2000, "набораў для малака" - каля $ 8-9. Кали меркаваць па гасцёўні сайта заводу, то схаваная прапаганда беларускага малака актыўна вядзецца і на расійскі рынак.

Даеш у кожную расійскую сям'ю набор для беларускага малака! :)

За мокры газ!

Sat, 21 Mar 2009 18:57:43 GMT

Новыя тэхналогіі ў захоўванні ад агню газаправодаў пад лозунгам "Мокрае не гарыць!" :))

За Маскоўскую!

Thu, 29 Jan 2009 20:01:54 GMT

Вечар. Жоўта-ліхтарныя вуліцы. Маршрутка нясецца ў спальны раён. Пасажыры мараць пра дамашнія катлеты і тэлевізар. І от пля - чарговая паднятая рука на прыпынку. У салон увальваецца карэнасты мужычок з паўлітрай алкаголю ў страўніку:
- Шэф, да Маскоўскай даеду? - і плюхаецца на вольнае месца.
- Гы-гы... - вадзіла ржэ і кажа, - не, братку, Маскоўская ў другі бок.
Катлеты павольна сплылі са свядомасці грамадзян. А мужычок тупіць. Сядзіць і тупіць. І праз колькі дзесяткаў секундаў выдае:
- А мне здаецца, што Маскоўская ў гэты бок!
- Хмых, - выдае вадзіла і кранаецца з месца, - ну ў той дык у той, паехалі на Ландэра...
- Мдзя.... - уздыхае мужычок. - Даўно на ландэра ня быў.... Але ўсё ж такі там - Маскоўская.

За Сібір!

Tue, 27 Jan 2009 22:35:53 GMT

Жыў-быў мядзведзь. Нармальны такі сібірскі мядзведзь. Як водзіцца, граў на балалайцы і піў гарэлку. А аднайчы выйграў у лато пуцёўку ў Еўропу. І паехаў са сваёй Сібіры ў Мінск. Прыехаў, агледзеўся: не па-хрысціянску тут. Цёпла, зіма слякотная. Пакумекаў трохі мядзведзь і прадаў балалайку. А грошы аддаў Уладару тэрмометра. І зараз мядзведзь як дома - на табло роўненька -52. Эх, Сібір, Сібір....

За гучныя ночы!

Sun, 26 Oct 2008 00:32:57 GMT

Шэлест клавішаў на ноўце. Сапенне соннага суседа па пакойчыку. Трактарны гул лядоўні. Звонка мокрае капанне вадзічкі з крана. Стогны дзяўчыны ў суседнім пакойчыку, па якіх чуваць, што там сусед - мужык.

"...Ночы вы мае чорныя
Крумкачы не злічоныя..."

За ўважлівы гандаль!

Sun, 27 Jul 2008 13:52:51 GMT

Дыялог у краме.
За вітрынай з кілбаснымі вырабамі стаіць прадавачка і мэтанакіравана спрабуе запіхнуць цэтлік з цаной у пластыкавы трымальнік. Набіраюся нахабнасці і перарываю яе медытацыю:
- Мне, калі ласка, тры сасіскі доктарскіх узважце...
Рэакцыі нуль. Прадавачка з тым жа самым імпэтам піхае цэтлік. Чакаю. Нарэшче, праз пару хвілінаў, кілбаса на вітрыне займела кошт. Прадавачка падымае на мяне вочы:
- Якіх?
- Доктарскіх...
Праз невялікую паўзу:
- Пакажыце іх на вітрыне.
Тыкаю пальцам ў свежа-ружовыя сасіскі.
Прадавачка выцягвае шыю як гусыня, заглядвае ў вітрыну, адыходзіць на два крокі, лезе пад стол, выцягвае адтуль тры сасіскі і вялікі нож. І намерваецца ўжо нешта крамсаць:
- Дзве кажаце?
- Тры.
Кідае іх на вагі, прылеплівае цэтлік і аддае мне. Нарэшце.

Чытаць-неперачытаць

Mon, 04 Feb 2008 23:11:19 GMT

"Чытаць-неперачытаць" - вось :)